نصائح لـ"عراعير" أوكرانيا...كوميديا سوداء بتوقيع الثورة السورية

ما هي إلا ساعات قليلة حتى زاد عدد من ينوي حضور مناسبة "وجه نصيحة لثوار أوكرانيا" على "فيسبوك" عن ألف شخص.

المناسبة التي أنشأها شاب حمصي باسم وهمي استقطبت عدداً كبيراً من ناشطي "فيسبوك" ولكل منهم رسالة يريد إيصالها لإخوته الثوار في أوكرانيا!

الصفحة ليست معنية بالوصول إلى الأوكرانيين أصلاً، فهي بالعربية وتهتم بالوضع السوري الخاص بعد "أكرنته" باستخدام طريقة الصياغة اللغوية الأوكرانية وإلحاق "وف" و"فيتش" و"فسكي"، بالكلمات العربية والمسميات السورية المعروفة، من مثل: شرعوفيتش عن نائب الرئيس السوري فاروق الشرع، وعرعوروف عن الشيخ عدنان العرعور، ودرعانوف عن مدينة درعا وغيرها الكثير...

تعددت اهتمامات المشاركين في التعليق على المناسبة، والغالبية العظمى من المشاركات كانت ساخرة ولم ينج من سخريتها شيء، فالمعارضة السياسية نالت نصيبها وهذا غيض من فيض:

"- إذا طلع عندكن تيار سياسي اسمو "هيئة التنسيق الوطنية" برئاسة واحد اسمو هيثموف مناعوف, فوراً بتئطعولها كرت أحمر لأنها مو نفعانة لا للخل ولا للخردل.

- قصة ائتلاف وما ائتلاف ومجلس وطني وكل يوم أحد بعد الصلاة تطلعون من الكنيسة وطالعين فلان يمثلنا ترى كلهم كذابين ويمثلون عليكم."

في حين نال الشيخ عدنان العرعور نصيب الأسد من المشاركات التي غمزت من قناة المعارضة:

"- إياكم والقس عرعورفسكي ونصائحه بالتصليب في وجه الدبابات أو القرع بزجاجات الفودكا الفارغة.

- إذا طلع القس عندكم وقال لكم حطوا حواجز وقال للرئيس أتحداك يا جبان أن تدخل كييف لاتجنوا ديروا بالكم ترا والله تتبهدلوا وراح تشيلوا الحواجز وتكنسوا الشارع.

- لا تنتخوا إذا طلع البطريارك عروعوروف وقلكن هبوووو... ترا السوريين هبوا قبلكم وتبهدلوا."

كما لم تنجُ المعارضة المسلحة وتشكيلاتها وعملياتها من السخرية:

"- جيش الصليب بقيادة زهرانوف علوشوف ما رح يفزعلكن من الآخر.

- لاتصدقوا خبيوف إذا أعلن اغتيال الرئيس الأوكراني وهو بطريقه لأداء الصلاة في الكنيسة الكبيرة.

- مو كل رصاصتين تسووها اشتباكات عنيفة في محيط الفرقة 17 اوعكم ها مشان ماتتبهدلو.

- ساعة الصفر... ترى تخلص الثورة وما تجي مو تقعدون تنتظرون.

- ما كل ما طلعت مروحية فوق القصر الجمهوري أو مشفى الكييفي معناتا اغتالوا الرئيس.

- لا لتشويل المنطقة الصناعية الأوكرانية.

- من أولها بلا انسحابات تكتيكية يرضى عليكم.

- حاصرو مطار منغ من بكرا لأنو دوبكم تلحقوا تاخدوه."

وكان لتنظيم الدولة الإسلامية (داعش) نصيب كبير من السخرية ومثالها:

"- أهم شي ما تطالعوا أغنية سلامي على كييف.

- ديروا بالكن من الدولة المسيحية في روسيا وأوكرانيا بكرا بكفروكن ياعملاء الغرب.

- خلي عيونكم عشرة على عشرة عالحدود وديروا بالكم يفوت لعندكم شي اسمو "الدولة السوفيتية في روسيا وأوكرانيا" ساعتها رح تدبق ببلدكن ورح تصير باقية وعم تتمطمط.".

كما كان للحراك السلمي والناشطين نصيب من النصائح:

"- لما تشوفوا غارة جوية لا تخافوا تطلعوا وين ينزل الصاروخ وبسرعة ع الإنقاذ، لانوا ما رح ينزل صاروخ تاني بس احذروا من قذاف الهاون.. بعد التانية توجهوا للإنقاذ.

- بحياة أمك لا تكتب على حيط الزنزانة "رضاكي يا أمي" لأن كل رفقاتك نفسيتهن بتتعب وبصيروا نفسهن يقتلوك اكتب أبو عذاب يتحدى الصعاب... معليش.

- عمي أنت وياه من الأخير.. الله بيعوضكم عن سندويشة الكباب وهل كم قرش.. روحوا ناموا بلا ما تصفوا بالخيم بعدين.

- إذا جورجيا عملولكم مخيم اسمو "الزعتري" لا حدا يروح عليه."

وكان للسياسة الدولية ومواقفها نصيب أيضاً من السخرية:

"- كلما قلق بان كي مون، اعرفوا... لقد وقعتم في الفخ.

- بس سمعتوا أوباما عم يحكي بسيرة الخطوط الحمر.. شمعوا الخيط ورجلكن بالثورة.

- إذا أجاكم الأخضر الإبراهيمي معناتو خربت البلد.

- إذا سمعتم مسؤول أمريكي يقول يناكوفيتش أيامه مع دودة لا تفهموها أيامه معدودة."

ولرموز النظام ومؤيديه وعملياته العسكرية نصيب وافر لم يغفله الساخرون:

"- قدري جميلوف رح يعمل معارضة داخلية أول شي وبعدا يهرب برا البلد انتبهوا يا شباب.

- إذا بعض الممثلات واجهوكن بالصدور العارية ارجعوا لحضن الوطن.

- رح تبدأ الحكومة الأوكرانية برفع شعار: خلصت، بس انتوا لا تستعجلوا وتقولوا: قرّبت.

- أوعكووون تصدقوا أسطورة انشقاق فاروق تشيكوف.

- حسن نصروفوتش لن يسمح بسقوط أوكرانيا يانوكوفيتش بأيدي الأصوليين.

- كل واحد أختو متعودة تطلع بعد الساعة ٣ بالليل ينبّه عليها لاتتأخر من اليوم ورايح.

- لا تعلقوا مع قوات الدفاع الوطني لأنو فيهن اللبوات، وأنتوا لبواتكن بيقدروا بيعملوا مصالحة مع جبهة النصرة خزيت العين.

- لا ترتعبوا اذا لقيتوا الطيران الأوكراني عم يزت عليكن حلل فول وآظانات حمام... بيكون عم يحميكن من الإرهابيين."

وكان للنصائح الاجتماعية أبطالها أيضاً:

"- يلي ناوي يتجوز هلأ يعيفا شوي سنتين زمان وبتصير الجازة متل شربت المي ومابقا حدا يطلب منك بيت ملك ولا غيرو."

كما كان لمن لُسِع من التجربة السورية نصائح للأوكرانيين بالتعقل والكف عن الثورة، هذا الفعل المجنون!

"- جهزوا من هلأ هتاف "يانكوفيتش يا أخونا... أهل كييف ورّطونا".

- قصروها من أولها... وبوسوا شوارب بعض.

"وجّه نصيحة لثوار أوكرانيا" مناسبة جعلها ناشطو الثورة السورية على "فيس بوك" مجالاً للبوح بالمسكوت عنه، والتعبير غير المباشر عن إحباطهم وفقدانهم الثقة بالمجتمع الدولي والمعارضة السياسية والمسلحة، وكل ما من شأنه أن يسهم في إنهاء الأزمة السورية عبر استخدام القناع الأوكراني كما استخدموا القناع الصيني في "صفحة الثورة الصينية" من قبل.