شهادة فتاة شاركت في مظاهرة الحجاز اليوم ...

نقلت احدى الفتيات على الفيس بوك وهي من المشاركات في مظاهرة الحجاز جزء مما حدث معهم اليوم :

اليوم اتجمعنا كنت متأخرة حوالي الربع ساعة وأنا من بعيد بديت اسمع أصوات الشرطة قلت لحالي أنو وييين بكون يلي ضرب ضرب ويلي هرب هرب ..ونحنا بدمشق متعودين يلي بيتأخر دقيقة على مظاهرة مستحيل يلحقا..
مشيت مشيت وصلت لقيت تجمع ..طلعت لقيت لافتات !
أول شي فكرت فيه أنو الحمد لله يلي عشت وشفت هيك منظر حضاري ببلدي ..
... ووقفت ..لقيت رجال محترمين كبار بالسن واقفين معنا ..درت ورايي لقيت لافتة مكتوب عليها شكل الدولة يلي منتمناها طلعت كمان لقيت لافتة أوقفوا القتل ..
حملنا لافتات ووقفنا وضلينا واقفين ..الصحافة تصور .. ونحنا واقفين ..حسيت حالي بمكان غريب بس ممتع كتير..حسيت حالي بين أهلي ..العلم السوري ما انوجد ..بس كان معنا العلم الكردي :)
كان في امرأة كبيرة بالعمر لاففته على رقبتا !
اجا تلفزيون الاخبارية السورية انطعجنا ..بس مو مشكلة طالما لافتة بتعبر عن أنو نحنا لح نستمر بالثورة :)
كنت فرحانة أني هنيك مع أني خفت شوي (كونو مو متعودين على هيك وقفات مواجهنا وحوالينا شبيحة ونحنا واقفين مافي شي حامينا..متعودين مظاهرة 5 دقائق بالكتير ونهرب )
المظاهرة علمتني ..أنو نحنا بحاجة للكبار بالعمر..بحاجة يوقفو معنا ..
علمتني أنو نحنا لازم نكون سوا ..
مالح انسى لما عمو قلنا أنتو امشو ونحنا منمشي وراكم ..نحنا ورايحين
تعلمت أنو مهما هتفنا ممكن الكلمة الصامتة تحمينا وتوصل فكرتنا..
علمتني أنو طالما أنت ماشي على خطتك وما عم يصير خسائر فهاد الشي لا يعني أنو نحنا مع النظام :) ولا يعني أنو نحنا مالنا وطنيين!
علمتني المظاهرة اليوم أنو الرجال المعارض اللي في الداخل يلي عم ينزل ويوقف بأول الصفوف هو انسان شريف لا يحق لأي حدا أنه ينعته غير أنه انسان وطني رائع ومقدم مصلحة الوطن على حاله,ونازل بكل وقار ليشارك مع الشباب وهو عرفان أنه بأي لحظة ممكن يتعرض للاهانة!!
ومن المعيب أنه نشكك فيه أو نحكي عليه !!
طفل من الأطفال اللي ببيعو عادة بالشارع ..طلب لافتة أوقفوا القتل ..حملا وصار يطير فيها :)
بحب أحكي أنه نحنا بقدر مالنا مبسوطين بالمشاركة على قد ما حز بقلبي انو العدد قليل..فهاد الشي لا يعني أنو اللي صار خطأ ..
نحنا طلعنا بوسط الشام ورفعنا مطالبنا ..والتم حوالينا الأمن .. ما كنا محميين ..كانت اللافتات بمثابة فخر الي أني شاركت بمظاهرة ..بأرقى لافتات ..مظاهرة فيها أرقى المطالب ..
وأنا بأكدلكم أني وطنية ..والمظاهرة يلي طلعت فيها وطنية .. وبامتياز وكنت مشتهية كل الشعب السوري يعيش هي اللحظات ..
رغم تجاهل معظم القنوات الأخبارية الخبر لتركيز ها على التصعيد والعنف لكن يكفي أن مئات السوريين رؤونا وقرأوا شعاراتنا خلال مرورهم من الساحة على مدى ساعة تقريبا