بيان انتخابي ..( انتخبونا ولكم الأجر والثواب ) ... خليل صارم

ليس المهم أن تعرفونا أو تسمعوا بنا .. وليس المهم أن نعرفكم ببرامجنا أو خططنا وأحلامنا لأنها ان خرجت ستفضحنا وتكشف جهلنا وقلة حيلتنا .. فنحن حقيقة لانملك أية برامج ولاخطط ولانعرف لماذا في شباط تموء القطط .
انتخبونا ولكم الأجر والثواب وحسن الخاتمة وتعازينا المسبقة بجل المصاب داعين الى الله ألا نسبب لكم العصبي والعصاب ونعدكم أن نتوارى خلف الباب وارتال الحجاب .
أحسبوا أنفسكم أنكم في حفلة انتخاب ملكة البطاطا والفجل .. وهي حفلة وخلاص.. ياأبناء الناس
هي ديكور للديمقراطية والحرية ..ونحن غدا ً ..ونعدكم قطعا ً .. أننا سنخطط حسب الحالة وفور وقوع المشكلة سنبحثها وننبشها ونجد لها العلاج الشافي بعد أن يعاينها عبد الشافي وزيزي ونانا وفلفل وأبو القوافي .
نرجوكم ألا تحرجونا فقد تخرجونا .. وبالبرامج لاتطالبونا .. فهذا فخ لن نقع فيه لأنكم غدا ً عليها ستحاسبونا وتسألوننا عمن أكل البيضة والتقشيرة وشفط وراها صندوق البيرة .. ثم استدار وقطع الماء والملح والخميرة .
انتخبونا على مبدأ أغمض عينيك و( حط اصبعك ) واللي بتوقع عليه انتخبوه ولاتسألوا من هو وماذا يعمل ومين ابوه وعائلة اللي خلفوه حتى لاتفضحوه . والقصة كلها اعتبروها حزورة . واللي بيعرفها بيكون شاطر.
انتخبونا أجاركم الله وأثابكم وحماكم ورعاكم .. حسنة لله يامحسنين .. انتخبونا وبلاش فضايح قدام اللي جاي واللي رايح .
انتخبونا .. بتعرفونا مابتعرفونا .. مش مهم ..المهم أن تنتخبوننا برضاكم وهذا أحسن والا نحنا ناجحين ..ناجحين .. وبلا نق ونقاقين وعنكم مش سائلين .. وروحوا بلطوا البحر أو حتى لتو واعجنوا الطين .
ليش مش عاجبكم ابو الخرفان بفريكة .. وليش مش عاجبكم مستر تكتيكي .. واللا الشفيط ابو كرش .. ماله ..كويس وعين الله عليه .. وكمان بتحكوا على ابو لهطة وأم شفطة .. بس ماكمشمتهن الشرطة . واللي مابتكمشوا الشرطة بيظل نظيف وظلوا خفيف بس بدوا شوية تنحيف وهذه مقدور عليها ..طولوا بالكم ..بس انتخبوهم .
انتخبونا ولاتتعبونا .. انتخبونا ولا تسألونا حتى لاتسئلون .. وننصحكم لأنكم ( مش قد) أبو الهمايم وابو العزايم وابو الجماجم .. انتخبونا لأنو هيك بدهم .(ولك انتو مفكرين حالكم أفهم من الحكومة ) ولك الحكومة أفهم من بني آدم ولاااااه .. وأنتو مش بني آدم . لذلك وبناء عليه كذلك . فقد قررنا أن تنتخبونا . فهل فهمتم .. العمى صحيح انو مخكم سميك .. خلاص ... وبلا... تعليك . روحوا انتخبوا ولاااااااه . واللا عمركم ماتنتخبوا لأنو الشباب هيك ناجحين وهيك ناجحين . فهمتوا واللا لساكم مش فاهمين .. وباي باي ياحلوين ياشاطرين .. ونحنا وياكم بالعسل نايمين .